”بالورقة والقلم ” لو اشتريت عجل وذبحته ثمن كيلو اللحمه بكام بعد الذبح

في حوار خاص مع الدكتور أحمد الشبح لموقع الحدث ٦٠ عن اسعار اللحوم ..

صرح الدكتور أحمد قائلا

اسعار اللحوم خلاص هتجنن الناس ومافيش قعدة في أي مكان إلا ويتكلموا عن أسعار اللحمة

ومن ضمن الأفكار المتداولة والمكررة هي إن مجموعة يشتركوا مع بعض ويدبحو عجل ويقسموه وفي عقلهم إن ده هيوفر كتير عليهم في سعر الكيلو
وأنا هنا هشترك معاكم في تمن العجل وموافق إن إحنا ندبحه مع بعض
بس أنا وعلشان مجالي وتخصصي واحتكاكي الدائم بالمجازر والجزارين اسمحولي إن أجيب ورقة وقلم ونحسبها

أولاً إحنا خلاص اتفقنا هنجيب عجل بلدي وليكن وزنه مثلاً 500 كيلو قايم ( حي)
سعر الكيلو في السوق حالياً 115 جنيه
يبقى نضرب 500 ×115=57500
وهننقل العجل في عربية هتاخد مثلاً 100 جنيه يبقى المجموع 57800

هنتفق مع جزار يدبحه ولنفرض مثلاً إنه هيجاملنا جداً وهياخد بس 1000 جنيه
يبقى المجموع 58800

هنبيع الأحشاء والراس والرجلين وهنتفق على تمنهم وطلعنا شاطرين واتفقنا على 3500 ( وده حد أقصى)
يبقى العجل تمنه علينا 58800-3500=55300

برضو اتفقنا نبيع الجلد ولنفرض بحد أقصى جداً 100 جنيه يبقى التكلفة 55200

العجل ال500 كيلو قايم بيصفي على 230 كيلو لحم ( كيلو عادي مش لحم أحمر صافي)

يبقى عايزين نعرف قيمة الكيلو هنقسم التكلفة النهائية 55200÷230=240 جنيه

دي هي الحسبة الواقعية لما تفكرو تدبحو عجل لنفسكم مع إن ده قانونًا خطأ لأن ده دبح خارج السلخانة وكمان مخاطرة لإن لا قدر الله فيه إحتمال يكون فيه مرض يظهر بعد الدبح يستدعي اعدام جزئي أو كلي

طب لو جه حد وقال إحنا هندبح أنثى علشان هتكون أرخص في الشراء

أولًا أنا هعترض على كده لأن ده من أهم أسباب تدمير الثروة الحيوانية ده غير إنها تعتبر جناية والقانون بيعاقب عليها بالحبس والغرامة

لكن وعلشان برضو اكشفلكم كل حاجة وتساؤل ممكن يدور في أذهانكم ….. هحسبهالكم

أولًا الأنثى مالهاش سعر قايم وهتبقى انت وشطارتك في الشراء لكن هنفترض إنك اشتريت أنثى ب ٣٢٠٠٠كانت حوالي ٣٠٠ أو ٣٢٠ كيلو قايم

هتنقلها ب١٠٠ جنيه لمكان الدبح هيبقى تمنها ٣٢١٠٠
هتبيع الاحشاء والراس والرجلين والجلد ب ٣٠٠٠ هيبقى التكلفة ٢٩١٠٠
هتدفع للجزار بحد أدنى ١٠٠٠ يبقى اجمالي التكلفة ٣٠١٠٠
ممكن تصفي معاك١٥٠ كيلو ( لحم عادي مش صافي أحمر)
هنقسم التكلفة الاجمالية٣٠١٠٠ على ال ١٥٠ كيلو هيكون الكيلو تقريبًا ب ٢٠٠جنيه
وعلشان كده ممكن تلاقو في بعض الاماكن والارياف سعر الكيلو ٢١٠جنيه

وطبعًا مننساش إن لحوم الإناث أقل جودة من الذكور وزي ماذكرت لحضراتكم القانون بيعتبرها جناية وأصلًا ذبح الإناث هو اللي تسبب في أزمة الثروة الحيوانية الحالية.